فیس بُک اسلام کے خلاف نفرت انگیز مواد پر پابندی لگائے، عمران

0

سوشل میڈیا پلیٹ فارمز پر مسلمانوں کے ساتھ روز بروز بڑھتی بدسلوکی اور کردار کشی کے پیش نظر فیس بک پر اسلام کے خلاف نفرت انگیز مواد کی اشاعت پر بھی اسی طرح کی پابندی لگائی جائے جیسے ہولوکاسٹ پر تبصرے کرنے پر لگائی گئی ہے۔۔۔

اسلام آباد (میزان نیوز) وزیراعظم عمران خان نے سماجی رابطوں کے پلیٹ فارمز کی سب سے بڑی کمپنی فیس بک کو کہا ہے کہ ہولوکاسٹ کی طرح اسلاموفوبیا اور اسلام کے خلاف نفرت انگیز مواد پر پابندی عائد کی جائے، فیس بک کے چیف ایگزیکٹو افسر مارک زکر برگ کو لکھے گئے خط میں وزیراعظم نے کہا کہ میں آپ کی توجہ بڑھتے ہوئے اسلاموفوبیا کی جانب مبذول کروانا چاہتا ہوں جو دنیا بھر میں نفرت، انتہا پسندی اور تشدد کی حوصلہ افزائی کررہا ہے ایسا خاص طور پر سوشل میڈیا پلیٹ فارمز بالخصوص فیس بک کے ذریعے کیا جارہا ہے، وزیراعظم نے کہا کہ میں ہولوکاسٹ پر سوال اٹھانے یا تنقید کرنے والی پوسٹس پر پابندی کیلئے آپ کے اٹھائے گئے اقدامات کو سراہتا ہوں جو جرمنی اور یورپ میں نازیوں کے ہاتھوں یہودیوں کے قتل عام کی انتہا تھی، انہوں نے کہا کہ آج ہم دنیا کے مختلف حصوں میں مسلمانوں کے خلاف بھی ایسا ہی منظم قتل عام دیکھ رہے ہیں، انہوں نے افسوس کا اظہار کرتے ہوئے کہا کہ بدقسمتی سے کچھ ریاستوں میں مسلمانوں کو لباس سے لے کر عبادت تک کے ان کے جمہوری ذاتی انتخاب اور ان کے شہریت کے حقوق دینے سے انکار کیا جارہا ہے، وزیراعظم نے تحریر کیا کہ بھارت میں مسلمان مخالف قوانین اور اقدامات مثلاً سی اے اے اور این آر سی کے ساتھ ساتھ مسلمانوں کی ٹارگٹ کلنگز اور مسلمانوں کو کورونا وائرس کے پھیلاؤ کا ذمہ دار ٹھہرانا اسلاموفوبیا کے مکروہ رجحان کی عکاسی کرتا ہے، عمران خان نے کہا کہ فرانس میں اسلام کو دہشت گردی سے جوڑا جارہا ہے اور ہمارے نبیؐ اور اسلام کو ہدف بنانے والے گستاخانہ خاکوں کی اشاعت کی اجازت ہے، وزیراعظم کا کہنا تھا کہ سوشل میڈیا پلیٹ فارمز پر مسلمانوں کے ساتھ روز بروز بڑھتی بدسلوکی اور کردار کشی کے پیش نظر میں فیس بک پر اسلاموفوبیا اور اسلام کے خلاف نفرت انگیز مواد پر بھی اسی طرح کی پابندی لگانے کی درخواست کرتا ہوں جیسا کے ہولوکاسٹ کیلئے عائد ہے، خط کے آخری حصے میں وزیراعظم نے کہا کہ نفرت کے پیغام پر مکمل پابندی ہونی چاہیئے، وزیراعظم نے کہا کہ دنیا کو اسلاموفوبیا پر مکمل پابندی سے قبل مسلمانوں کے خلاف قتل عام کا انتظار نہیں کرنا چاہیئے جیسا کہ بھارت اور کے زیر تسلط کشمیر میں ہورہا ہے، انہوں نے کہا کہ یہ بذات خود تعصب اور جانبداری کا عکاس ہے جو بنیاد پرستی کی حوصلہ افزائی کا سبب بنے گا، یاد رہے کہ اقوامِ متحدہ کی جنرل اسمبلی کے 75ویں اجلاس میں وزیراعظم عمران خان نے اسلاموفوبیا کے واقعات کی جانب عالمی برادری کی توجہ دلائی تھی اور ساتھ ہی انہوں نے اسلامو فوبیا سے لڑنے کیلئے ایک عالمی دن مختص کرنے کی بھی تجویز دی تھی۔

Share.

About Author

Leave A Reply